GU Skali

Mau bikin postingan dalam bahasa Manado ah. Kali ini mau edisi curhat, jadi bisa terluapkan dengan baik.

marketing-man-person-communication.jpg

*****

Jadi depe carita, beberapa minggu lalu kita da baku slak deng tamang. Pangge dia A. Pertama dia baku slak deng tong pe tamang satu lagi, mar akhirnya jadi tabuka samua. Sebenarnya kwa kita nimau mo tulis sih. Cuma jadi kenangan jo. Kalo ternyata ada jo kote orang bagini di dekat pa kita.

Mar nintau, feeling sto kang. Memang dari awal kita deng dia ini nda dekat skali. Bajalang noh, baku bawa kamana-mana sama-sama, mar nentau kiapa, kita nda pernah enak mo cirita yang so ta lebe sadiki. Pokoknya kalu mo bacirita memang cuma depe luar-luar. Waktu kita da baku salah deng orang laeng misalnya, tamang laeng yang memang kita anggap dekat, qt cirita samua, mar dia ini cuma rupa dp permukaan. Dp sisa nda.

Mar kita pe orang ini, kalo ngoni so kenal dekat, bukang tu model-model karlota yang suka ja angka teru cirita orang laeng. Jadi kita simpang jo dihati. Kalo depe bahasa gaul “Cukup tau jo”. Mar soal ini kali depe kalakuan so nda biasa, so nda bisa tolerir, so itu selain kita bajao dari pa dia, kita mo tulis le disini supaya jadi pengingat for kita. Nanti kalo ada tamang rupa bagini lebe bae iko ba jao jo tre.

Jadi depe carita ni parampuang satu ini nentau eh da ba gimana sto pa kita sampe tape cirita yang kita nda cirita pa dia kong dia boleh mo dapa tau. Bayangkan jo itu.. Cek para cek kote dia ja dengar-dengar kalo pas kita bicara di telpon.

Pernah tu hari kita bacarita deng ta pe spupu soal depe kasus, tau jo to Manado pe toa, jadi so nda kontrol kalo so bicara di telpon. Ya ilahh, nintau kote ni mace satu da iko-iko dari blakang kong ba lota. Baginieee, kalo ngana tamang yang bae, dengar ng pe tamang da bacirita kong suara talu kancang, kuleto kek kong se inga.. Eh, seplang sadiki tu bicara, orang laeng dapa dengar. Ini nda, dia ba ruju kong ba dengar trus sepanjang jalang. Depe abis itu cirita pa orang laeng. Sampe sini so lumayan ilfil sih kita pa dia.

Kong waktu kita da beking sesuatu, kita nda sama skali cirita pa dia, kita cirita sih pa tong pe tamang satu lagi, Tiba-tiba, ni tamang satu tanya “Eh, Py, nga da cirita pa dia soal ini” “Nyanda” “Kong kapa dia tau dang? Dia tanya pa kita soal ini” ihh takage jaha kita. Tau dari mana dia nah? Mar katu karna kita masih da ba positif pa dia jadi nda ambe talu bagimana. Akhirnya pas ada depe waktu kita cirita noh soal itu pa A ini. Sudah, ta pe kira so klar.

Kong beberapa bulan berikut, nda brapa lama kemarin, sekitar satu bulan sto, baku slak. Karna baku slak bagini samua tu cirita ta bongkar. Ternyata kote dia ja GU qt pe hidop selama ini. Samua dari depe cara ba dengar kita ba telpon. Bayangkan, dia boleh tau kita ja ba transfer pa tamang. Bilang kita ja ba ambe utang pa tamang sablah. Padahal kita percaya skali ni tamang satu ini nda lota depe orang. Mo tau dari mana tre kalo bukang ba GU pa kita ba telpon. Dia nintau kalu tu utang itu utang biasa yang sama deng torang jo noh kalo blanja. Sapa pe temang ada kartu kredit yang pas promo tong pake, bayar kalo pas gajian ato tagihan datang. Wajar. Kita pe kartu le bagitu. Yang jadi nda wajar kalo ni orang ba dengar cirita, nintau apa-apa, cuma dengar stengah, kong se sambung pa orang laeng. Luar biasa memang. Bagimana ngoni kalo jadi kita? Ilfil nda?

Ada banyak le cirita laeng, mar tu kita da ketik di atas jadi turning point kita so nemau banyak cingcong deng dia.

Selain depe sifat yang profokator, gila-gila urusan orang, sebenarnya katu ada beberapa noh depe bae. Cuma karna le dari awal secara hati kita so nda rasa dekat deng dia, jadi sudah jo tre. So tua le kong masih mo batamang rupa abegeh. Kalo so nemau lebe bae cut. Seperlunya jo sesuai fungsi. Lebe dari itu nda.

Sampe rumah, tu malam pas kita dengar cirita dari tamang satu lagi soal ni A pe kalakuang, kita inga-inga turus. Pernah nda ehh kita da ba GU soal dp hidop. Stenga mati da inga. Sampe di satu titik kita nda dapa sama skali. Nda pernah satu kali pun kita ba tanya soal A pe hidop ini pa tamang laeng. Karna pada dasarnya kita ini bukang orang suka ba GU. Kita mangarti, kalo dekat, sangali mo tanya, pasti tamang cirita. Kalo nda cirita, ya sadar diri jo, nda se dekat itu berarti noh.

Lagian, ta pe hidop so talu brat for mo kepo orang laeng pe hidop. Kacuali abis ba kepo kong kita dapa doi, deng snang hati komang itu. Nya perlu mo suruh le.

Yah sekian jo dulu kita pe curahan hati ni siang. Makase banyak so baca neh.

 

 

 

Advertisements

20 comments

  1. ndu.t.yke · February 12

    Kepo tp ga ngerti bahasanya. Ini menu subtitle-nya dimana sih Py? πŸ˜‚πŸ˜‚

    Like

    • Pypy · February 14

      Hahaha.. Lupa mem, belum di instal πŸ˜€

      Like

  2. naomitobing · February 12

    Ini bisa ada subtitlenya? Hahaha tapi ku suka dengen orang manado ngomong. Seru bgt kelihatannya.

    Like

    • Pypy · February 14

      hahahahaha.. Andai masuk di pilihan google translate ya XD

      Like

  3. Melissa Octoviani · February 13

    gua roaming py hahahaha….

    Like

    • Pypy · February 14

      hhahaa.. Interlokal masian Mel πŸ˜€

      Like

  4. Epi · February 13

    Gw mencoba memahami, tapi nyerah. Wkwkwkw

    Like

    • Pypy · February 14

      wkwkkwkwkw.. Bendera putih berkibar πŸ˜€

      Like

  5. xiaomeynie · February 13

    ini di gugel translate bisa gak py? XD

    Like

    • Pypy · February 14

      Semoga, tapi jangan deh.. Tar ga ada rahasia lagi..hahahaha XD

      Like

  6. Angel · February 13

    di kepala gw terngiang2 logat manado nya py hahaha :))

    Like

    • Pypy · February 14

      Hahaha.. Ngerti ora son? *terTuyuldanMbakYul

      Like

  7. adhyasahib · February 13

    Iiih biasa suda, di ternate sini tong bilang orang kayak bgtu tu orang karlota :-))

    Like

    • Pypy · February 14

      Iyo, karlota memang. Nda sangka le, hari2 bakubawa ternyata model bagitu kote.. ckckck

      Like

  8. Melissa · February 13

    intinya adalaaaaaaaah…????

    Like

    • Pypy · February 14

      Ada orang yang diam2 kepoin semua tindak tanduk gw dan digunjingkan didepan orang lain.. Mendadak berasa seleb gw..hahaha

      Like

  9. Rere · February 15

    Baru da baca hahahahahha doh memang malas skali eh batamang deng org bgitu kang. Sama le kakpy kt paling nda suka deng org ja ba karlota. Jd lebe bae menjauh jo kasiang drpd beking tmbh stress hahahaha

    Like

    • Pypy · February 15

      Bayangkan Reee.. Dia kong boleh tau hal yg kita nda bicara akang noh..ckckck.. Memang GU pe nenek moyang.. Iyo, lebe bae ba jao satu kali.. Aman lahir bathin..

      Like

      • Rere · February 15

        Brarti depe kepo so level atas komang itu kang hahahahah. Kalo sampe so ba curi2 dengar bicara di telpon mah so gengges skali eh. Bae le kalo cuma babadiam mar kalo sampe so cirita2 pa org lg duhhh ada org model bgtu kangπŸ˜‚πŸ˜‚πŸ˜‚

        Like

      • Pypy · February 15

        Adaaaaa.. Kong ini tamang yg baku bawa hari2.. Warbiyasaakk.. Kalo orang yg jelas2 jaha sih masih mending toh.. dp judul, duri dalam daging..wkwkwkw

        Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s