Disclaimer: Untuk yang ga mengerti Bahasa Manado, diskip aja.

Mo tulis tentang apa, mar gara-gara baca Mem Tyk pe komen pa Ge pe tulisan, jadi tabayang, mo coba ah beking postingan pake bahasa Manado. Mo lia brapa orang disini yang mo mangarti.. Haha..

Mar sebenarnya kita le sandiri bingo sih mo tulis tentang apa. Soalnya memang lagi kehabisan ide. Masa musti mo tunggu drama ley baru mo lancar batulis.. Haha. Nda ah. Skedu neh Opa Ye’.

Cuma sayang skali memang ni diri nda blajar apa-apa soal bahasa suku. Dulu kwa tinggal di Kotamobagu mar di lingkungan yang banyak orang Minahasa, jadi ya abu noh. Cuma satu bahasa jo yang kita tau sampe besar. Haha.

Banya orang yang ja bilang, Bahasa Manado itu gampang, lama-lama dengar mangarti. Iyo sih, depe Bahasa Manado gampang mo inga, mar sebenarnya ini blum depe bahasa Suku, depe bahasa suku sandiri banyak skali kong itu noh tu mo susah mangarti. Bahasa Manado itu kwa kalo disini sama noh deng Bahasa Jakarta. Lo-gue bagitu, kong banyak kata yang sama deng Bahasa Indonesia. Mar kalo so Bahasa Suku.. Beughh.. Baku abis jo tare. Baru Minahasa so brapa macam. Ada bahasa Tombulu, Tontemboan, Tonsea, Tolour, deng masih banyak lagi. Itu baru Minahasa, belum tu Suku Bantik, Mongondow. Ada le katu noh dorang pe bahasa sandiri. Yah secara umum dang tu Sulawesi Utara luas skali. Memang gaga ni Indonesia, baru satu daerah depe keberagaman so banyak skalianan.

Makanya ja bingo  deng orang-orang skarang tu masih ja kage deng ni Indonesia pe keberagaman Suku deng Budaya. Kiapa so musti ada istilah Pribumi nda Pribumi? Namanya so lahir basar di Indonesia, ya orang Indonesia lah. Depe pertanyaan kan sederhana toh, ngana so bekeng apa supaya ni nama Indonesia bagus? kalo nda babadiang jo di huk, nda usah bekeng rusak. Stuju?

Kong ada satu ley nih tamang-tamang kapista ja protes pa kita disini. Kalo misalnya orang ja tanya “Kamu dari mana?” ya pasti kita jawab Manado. Dorang protes, hih, nga tinggal di Kotamobagu, kiapa jawab Manado? Haha.. Bagini ehhh frenn.. Kalo yang tanya itu orang yang so tau tentang daerah-daerah di Manado, pasti kita langsung jawab dari Kotamobagu. Mar co ngana pikir kalo yang tanya orang yang nentau apa-apa. “Kamu dari mana?” kong kita jawab “Dari Kotamobagu” kong dia balas “Kotamobagu dimana ya?” ya tolehh.. Panjang toh penjelasan.. Wkwkw.. Mo cumu lai.. Oh itu 3 jam dari Manado. Jao sobb.. Cari aman jo tare. Haha.

Ya sudah, itu jo dulu kita pe tulisan ni hari. Depe cirita kwa ini cuma mo cek ombak kalo ada yang mangarti.

Siang bae jo for samua disini.